ဗီးနပ်စ် ရဲ့ သမီးပျို က
လှလှပပ ပြုံးတယ်
အိပ်မက်ရဲ့ အဆုံး
သူဟာ
နိဂုံး မရှိပဲ အဆုံးသတ်သွားတယ်
ဒါပေမယ့်
တဝက်တပြက်…။

လင်းလွန်းခဲ့ဖူးတယ်
အမှန်က ခပ်မှိန်မှိန် ခပ်ဖျော့ဖျော့နဲ့
ဒီရင်ဘတ်က
တိမ်တွေ ဝှက် ထားတဲ့
ဘယ်ဘက်ရဲ့ စည်းချက်အတိုင်းပဲ
မရပ်တန့်သေးဘူး…။

သေသွားတဲ့ ရင်ခုန်သံတွေ
အချပ်လိုက်ကွာကျသံပါ မာယာ
ဒိုရေမီဖာ သံစဉ်တွေလောက်
အားကျစရာမရှိပေမယ့်
ဟာသ ပြကွက်လို ဈေးမပေါပါဘူး
အဲ့လို အချိန်မှာတောင်
နှလုံးသားရဲ့ သံစဉ်ကတော့
မရဲ တရဲ နဲ့ ညည်းတယ်။

ငါ့ရဲ့ ရလဒ်တွေက
အကြွင်းမဲ့ပေမယ့်
သုည နဲ့ အဖြေမထွက်ဘူး
ပေါင်း နှုတ် မြှောက် စား
ဘယ်လက္ခဏာနဲ့မှ
အောက်သက်မကျေခဲ့တာ
ငါ့နှလုံးသားက
နင့်ရဲ့ တွက်ချက်မှုမှာ
ဘယ် ကိန်း ဂဏန်းနဲ့မှ
တစ်ထပ်တည်းမကျဘူး
နင်နဲ့ ငါဟာ
ဘယ်တော့မှ အချိုးမညီတဲ့
အရေအတွက်တွေပါ မိမာယာ။

အခုချိန်လောက်ဆို
နင်တချိန်က လက်ညှိုးထိုး
ဟိုးက
ကောင်းကင်ကြီးလောက်ချစ်တယ်ဆိုတဲ့
ပဲ့တင်သံတွေလည်း
တိမ်မဲတွေနဲ့ အတူပြိုကျ
မာယာရယ်…
ငါလည်း ထပ်တူ ငိုခဲ့ရတဲ့
တိတ်တိတ်ပုန်းညတွေက မနည်းဘူး။

လေညှင်းတွေရဲ့
တိုးတိတ်ဆောင်ယူတဲ့
ငါ့ရင်ခုန်သံတွေ
ငါ့ ကဗျာ သံစဉ်တွေ
ပြီးတော့.,
ငါ့ မျက်ဝန်းက အမှောင်ချထားတဲ့
ဘာမှန်းမသိတဲ့ ငွေ့ရည်တွေ
နင့်အိပ်မက်ထဲအထိ
ငါ လွင့်ပစ်ခဲ့မိပြီ မာယာ…
ငါ့အတွက် အိပ်ရေးပျက်ခဲ့တယ်ဆိုရင်
တရေးနိုးတောင်
ငါ့ကို မုန်းဖို့ မေ့မသွားပါနဲ့ မိမာယာ
ဒါဟာကျသင့်တဲ့ ပမာဏလောက် ပါပဲ။

ထပ်တလဲလဲ တွေးတယ်
ထပ်တလဲလဲ ဆင်ခြင်တယ်
ကိုယ်ဖောက်တဲ့လမ်း
ဘယ်ရောက်လို့ ရောက်မှန်းမသိအောင် ရူးသွပ်သွားတယ်
မက်ထရစ် အတိုင်းအတာတွေ
ဘယ်လို အချိုးကျ လည်းမသိဘူး
တစ်နေ့ တစ်နေ့
မိုနာလီဇာ ဘယ်လိုပြုံးခဲ့သလဲဆိုတာပဲတွေးနေမိတာ
နင့်မေးခွန်းတွေက
ငါ့ကို စာမေးပွဲ ကျလောက်တဲ့အထိ ရက်စက်တယ် မာယာ။

ဘဝဆိုတာ စီးကရက်လိုမျိုး
ကုန်ခါနီး ရောက်တိုင်း
အရသာပေါ့သွားတတ်တာမျိုးလား
ဒါမှမဟုတ်
ခပ်ပြင်းပြင်းဘီယာ တစ်ခွက်လို
သောက်လေ မူးလေပဲလား
အမှန်က ဘဝဆိုတာ
ခက်ဆစ်တွေ ပေါတဲ့
ကာရန် တစ်ပုဒ်ပါပဲ မာယာ…။

ငါ့တို့ဟာ ခပ်ကျဲကျဲ
ဲငါတို့ရဲ့ အတိတ်တွေဆိုတာကလည်း
အဆိပ်မိတဲ့ နွေထဲမှာမျောလို့
ဒါပါပဲ မိမာယာ
အချစ်ဆိုတာ
တိုင်းတာမရတဲ့ ဒီဂရီတွေနဲ့
လည်ပတ်နေတဲ့ ရဟတ်တစ်စင်းပါ
ငါတို့တွေ အတူတူ စီးရင်း မူးလာတဲ့အခါ
အခုလို တစ်ယောက်တစ်နေရာဆိုပေမယ့်
ထာဝရ စီးနှင်းသူတွေ လည်းရှိတယ်
သေချာတာက ကျိုးတိုကျဲတဲပါပဲ။

ဇာတ်သိမ်းပြီ မာယာ
ဒီကဗျာဟာ အတ္တဆန်ချင်ဆန်နေလိမ့်
ဒါပေမယ့် ဒီစာရေးဆရာက
ကိုယ်ချင်းစာတတ်ပါတယ် လို့
ငါပြောဖူးတယ် မဟုတ်လား မာယာ
နောက်တစ်ခါ ပြန်ဆုံရင်
ဒီ ပုံပြင်မှာ ဗိလိန် အခန်းမပါဖို့ပြောပေးမယ်။။ ၊။

ဇော်သက်ဦး

(အသစ် အသစ်တွေမဟုတ်တဲ့ ဟောင်းနွမ်းအိုမြစ်တဲ့ ချစ်ခဲ့ရသူ မာယာ ၇ှင်လေးကို ရည်ရွယ်သည်။)