လူတစ်ယောက်ဟာ အိမ်မက်တခုတည်းကို အများဆုံး ဘယ်နှကြိမ်လောက်မက်ဖူးမယ်ထင်သလဲ…….?

          ကျနော် ငယ်ငယ်က အိမ်မက်တခုကို အကြိမ်းပေါင်းများစွာမက် ခဲ့ဖူးပါတယ်။ အိမ်မက်ထဲက မြင်ကွင်းတွေ၊ အရောင်တွေ၊ အိမ်မက်က လန့်နိုး ရတဲ့ ခံစားချက်တွေက တစ်ကြိမ်နဲ့ တကြိမ် ကွဲပြားသွားတာမျိုးမရှိ တပုံစံထဲပါ။ ဘယ်အရွယ်လောက်အထိလဲဆိုတော့ ကျနော် မှတ်မိသလောက် ၄ တန်းလောက်အထိပဲ။ အဲဒီနောက်ပိုင်းလုံးဝထက်မမက်တော့ဘူး။

            ကျနော်နဲ့ ကျနော့ထက်နဲနဲကြီး မယ့်ကောင်မလေးတယောက် သစ်ပင်တစ်ပင်ပေါ်မှာ တယောက်လက်ကိုတယောက်ကိုင်ထားတယ်။ကျနော်တို့နှစ်ယောက်လုံး ကျောင်းစိမ်းဘောင်းဘီ အတိုလေးတွေဝတ်ထားတယ်။ ကြောက်လွန်းလို့ သူမရော ကျနော် ရဲ့ လက်တွေတုန်နေကြတယ်။ အဲဒီသစ်ပင်ရဲ့ အောက်မှာ ကျွဲတကောင် သူ့မျက်လုံးတွေကနီရဲနေတယ်။ ကျနော်တို့ ဆင်းအလာကို စောင့်နေတာပါ။ သေချာတာကတော့ အဲဒီသတ္တ၀ါ ဟာ ကျနော်တို့ ကို ရန်ပြု မယ်ဆိုတာပါပဲ။ နောက်တခု က သစ်ပင်ခြေရင်းက ညပ်ဖိနပ်လေးတစ်ရန်။ အဲဒီဖိနပ်ကလေးကလည်း ခုန သတ္တ၀ါရဲ့ မျက်လုံးလို ပဲ နီရဲနေတယ်။ ကျနော့ရဲ့ဖိနပ်လားသူမရဲ့ ဖိနပ်လား သေချာမသိပါဘူး။ ကျနော်မှာရောသူမ မှာပါ ဖိနပ်မရှိပါ ဘူး။ ခဏ နေ တော့ အဲဒီ ကောင်မလေးက ဖိနပ်အနီလေးကိုယူဖို့ ကျနော့လက်ကို ဖြုတ်ပြီး သစ်ပင်အောက်ကိုတွယ်ဆင်းသွားတယ်။ ကျနော်ကလဲ သူ့ကိုမဆင်းဖို့လှမ်းဆွဲတယ်။ အဲဒီလိုနဲ့ အိပ်မက်ကနေ ကျနော် လန့်နိုးခဲ့ပါတယ်။

              အဲဒီအိမ်မက်ကိုမက်တိုင်း အဲဒီနေရာမှာပဲလန့်နိုးပါတယ်။

              ဒီလိုနဲ့ ကျနော် အဲဒီအိမ်မက်ကို ၄ တန်း နောက်ပိုင်းလုံးဝမမက်တော့ပါဘူး။

              ၂၀၀၁ လား ၂၀၀၂ လားသေခြာတော့မမှတ်မိတော့ဘူး။ အဲဒီ နှစ်သင်္ကြန် က စိန်ကျွန်း မှာ IC မန်းတပ် လုပ်တဲ့နှစ်။ အကျက်နေ့။ ကျနော်က အဲဒီအချိန်တုန်းက ပဲခူးကလပ်မှာနေတယ်။

              အကျက်နေ ညနေ ၅ နာရီခွဲလောက် ကျနော်တို့ ကားနဲ့ လျောက်လည်တာကနေ နားလိုက်ကြပါတယ်။ စမ်းချောင်းထဲက သူငယ်ချင်းတွေကို အရင် ပို့ပေးပြီး ကျနော်တို့နေတဲ့ ပဲခူးကလပ်ကို ပြန်လာပါတယ်။ ဒီလိုနဲ့ လွတ်တော် နဲ့ ပြည်သူ့ ဥယျာဉ်ရှေ့ရောက်တော့ ဘီးပေါက်ပါတယ်။ ကားက ကန်တာ ပါ။ ဘီး ၆ ဘီးပါပါတယ်။ အခုပေါက်သွားတာက အနောက်ဘီး ၄ ဘီးထဲ က တစ်ဘီးပါ။ ဒီတော့ ပေါက်သွားတဲ့ ဘီးကိုဖြုတ် ပြီး ကျန်တဲ့ ၅ ဘီးနဲ့ ဆက်မောင်းလာခဲ့တယ်။ အဲဒီမှာ ကျနော်တို ဆယ့်ငါးမိနစ် မိနစ် နှစ်ဆယ်လောက် ကြာသွားတယ်။ ဒီလိုနဲ့ ပဲခူးကလပ်ရှေ့ရောက်တော့ နိုင်ငံခြားရေးရုံးရှေ့မှာ ကားတွေပိတ်နေလို့ကျနော်တို့ ဆင်းပြီးလမ်းဆက်လျှောက်လာခဲ့တယ်။ နိုင်ငံခြားရေးရုံး ဆိုင်းဘုတ်နားရောက်တွေ့ တွေ့လိုက်ရတာ ဒိုင်နာတစီးက အဲဒီရှေ့ကမြောင်းထဲကိုခေါင်းစိုက်နေတယ်။ လိုက်အိပ်စ် တစီးကတော့ ပလက်  ကားရုပ်တောင်မပေါက်တော့ဘူး သွေးတွေဆိုတာ ပြည်လမ်းတခုလုံးနီရဲနေတယ်။ ခေါင်းမှာသွေးတွေနဲ့ ပြေးတဲ့လူတွေကပြေး လမ်းပေါ်မှာ ဆန့်ငင်ဆန့်ငင်ဖြစ်တဲ့လူတွေက ဖြစ်ပေါ့ဗျာ။ ခဏနေတော့ဆေးရုံကားတွေရောက်လာပြီး လူနာတွေကိုတင်။ နောက်ပိုင်း ဆေးရုံကားမလောက်လို့ မာစတာဂျစ်တွေနဲ့ အလောင်းတွေသယ်တဲ့လူကသယ်ပေါ့။ ကျနော်တို့က လည်းဝင်ကူပေါ့။စိန်ကျွန်းမန်းတပ်က အထွက်ကားနှစ်စီးဖိုက်ကြတာတဲ့။

                 ကျနော့အင်္ကျီအဖြူတခုလုံးလဲနီရဲနေပါပြီ။ကျနော်နဲ့ခက်လှမ်းလှမ်းမှာ ကောင်မလေးတယောက် သွေးအိုင်ထဲမှာငြိမ်နေတယ်။ ဖြစ်နိုင်တာတော့    သူအသက်မရှိတော့ပါဘူး။ အဲဒီအချိန် လူနှစ်ယောက်က ကောင်မလေးကို သယ်ပြီး ကားတစီးပေါ်တင်သွားတယ်။ အဲဒီကောင်မလေးရဲ့ ရုပ်ကိုကျနော်သေချာမမှတ်မိလိုက်ပါဘူး။ ဒါပေမဲ့ သွေးအိုင်ထဲမှ သူကျန်ခဲ့တဲ့ ညှပ်ဖိနပ်အနီလေးတရန်ကိုတော့ ကျနော်ရင်းရင်းနီးနှီးမြင်ဖူးပါတယ်ဗျာ။………..

                                                                                                                              ( ကိုငယ် )

                                                                                                                             May 16 2012