ဆရာကကဗျာကို ခုခံကာကွယ်လွန်းနေပြီဟု ဆရာတစ်ယောက်က feedback ပေးပါသည်။ ကဗျာအတွက်ခုခံပေးနေစရာမလိုပါ။ သူ.အသီးနှင့်အပွင့်နှင့်၊သူ.ဝေဆာမှုနှင့်။ တိုက်ခိုက်သူရှိ၍ရေးနေခြင်းလည်းမဟုတ်ပါ။ကဗျာရေးချင်တယ် ၊မရေးတတ်လို.ဟုပြောသူများ ရေးရဲရန်သာဖြစ်ပါသည်။

ထပ်၍ဆိုပါမည်။ကဗျာအတွက်တိုက်ခိုက်သူများ၊ကာကွယ်သူများ၊ သမိုင်းတိုက်စားမှုနောက် ပါသွားကုန်ပါပြီ။ကဗျာသာပန်းပန်ကျန်ရစ်ပါသည်။ ကိုယ်ကခုခံကာကွယ်ပေးရန်မလိုပါ။

++++++

ဖေ့စ်ဘုတ်မှ ကွန်မန်.ဖြစ်ပါသည်။ သဘောတူသည်များရှိပါသည်။ မတူသည်များရှိပါသည်။ဖတ်ကြည့်စေလိုပါသည်။

“Pyei Phyo

ကဗျာသည် ကဗျာသာ ဖြစ်ပါသည်။ ကြိုက်သလိုပြော ကဗျာသည် ကဗျာသာ ဖြစ်သည်။ ထို့ကြောင့် ကဗျာလိုသာ ရေးရပါမည်။ ဘယ်လိုပုံစံရေးရေး.. ကဗျာ ဟုနံမည်တပ်တိုင်းတော့ ကဗျာ မဖြစ်ပါ…။ ကဗျာလို ရေးမှ ကဗျာ ဖြစ်ပါသည်။ ကဗျာလိုရေးဖို့ ကဗျာ့ဘောင်တွေ လိုလာပါသည်။ ဘောင်ကို… ချဲ့သည်။ ရွဲ့သည်။ လိမ်သည်။ ခွေသည်။ ကြိုက်သလိုလုပ်ပါ။ ရံခါမှာတော့ ကိုယ်ချပြတာ ကဗျာဖြစ်ဖို့ တိုက်ဆိုင်ပြသည်။ မတူတာတွေချပြသည်။ သဒ္ဒါကို ငှားသုံးသည်။ တူတာတွေ ယှဉ်ပြသည်။ လုပ်ပါ။ ကိုယ်လုပ်တာ ကဗျာလို့ နံမည်တပ်နိုင်ဖို့ ကြိုက်သလောက်ပြော… ကျသလောက်ရှင်း…။ ထပ်ပြောစရာကတော့ ကဗျာသည် ကဗျာသာဖြစ်သည်။ စကားပြေကို အပိုဒ်ခွဲပြီး စည်းကမ်းနည်းလမ်း တူရာစုပြီး ကဗျာလို့ ခေါ်လဲ ဖြစ်သည်။ ဂန္တဝင် နရီတွေ အစီလိုက် ပိုင်းပြလည်း ကဗျာလို့ နံမည်တပ်ရိုးအတိုင်း ကဗျာလို့ ခေါ်ပါ။ အခေါ်သက်သက် ဖြစ်သည့်အတွက် စာလုံးတွေကို ကဗျာခေါ်လဲ ဖြစ်ပါသည်။ တစ်ချို့ကြတော့ ပန်းကန်ပြားမှာ ကိုင်းတပ်ပြီး ပန်းကန်လုံးကိုမှောက်တင်ထားတာ ကဗျာဟုခေါ်သည်။ ဝေးသွားရင် နီးစပ်တာလေးပြောကြည့်မယ်။ ငှက်ကလေးတွေ တေးသီတာကို ကဗျာဆန်တယ်တဲ့..။ ဒါဆို ကဗျာဆိုတာ ဘာလဲ အရေးကြီးလို့လား… မေးစရာတွေနော်… ဒါကြောင့်ထပ်ပြောမယ်.. ထပ်ပြောပါရစေ…။ ကဗျာသည် ကဗျာသာ ဖြစ်သည်။ ဘာများ အရေးကြီးလို့တုန်း.. နော.. ခုလည်း ကဗျာလို့ ခေါ်ချင်ခေါ်ပေါ့.. ဝေဖန်ရေးလို့ ခေါ်ချင်လည်းခေါ်.. ငြင်းချက်လို့ ခေါ်ချင်လည်းေ ခ်ါလိုက်ပါဦး.. ဒါမှမဟုတ် ပလီစိချောက်ချက်လို့ ပြောမလား.. ရသေးတယ်။ ဒါပေမယ့်.. ဓနုဖြူကျော်သိန်း ဆိုတဲ့ ပလီစိချောက်ချက် ဆရာကြီးကတော့ လုံးဝဝင်မတွတ်ခဲ့ဘူး…။”

      အခုလိုပြန်ရှင်းခဲ့ပါသည်။

“သဘောတူပါသည်။ကဗျာရေးသူက ကဗျာဟုနာမည်တတ်ရေးလျှင်ရေးပါစေ။

မဟုတ်ဟုဝင်မပြောရန်ပြောနေခြင်းပါ။ ကဗျာ ဟုမတတ်လည်းရပါသည်။ သူလုပ်ချင်ရာလုပ်နေခြင်းဖြစ်ပါသည်။ မလုပ်နဲ့တားမရပါ။ ကဗျာဆရာသည် တားမြစ်မှုကိုလက်မခံပါ။ ဖတ်သူဖတ်မှလုပ်စရာနှစ်ခုပါရှိပါသည်။ကြိုက်ရင်ဖတ်ပါ။မကြိုက်…ရင်မဖတ်ပါနဲ.။သို.သော်ဒါကဗျာမဟုတ်ဟု မပြောပါနှင့်။ ပြောလျှင်လည်းရပါသည်။ ပြဿနာမရှိပါ။ တခြားသူကို မဖတ်ကြနှင့်မပြောစေလိုပါ။ သူများရွေးချယ်ခွင့်နှင့်ပါ။ အနုပညာရှင်၏လွတ်လပ်ခွင့်ကို ပိတ်ပင်၍မရစကောင်းခဲ့ကြောင်းကို ပြောသမျှ၏ အချုပ်အဖြစ်ဆိုပါသည်။

အဓိကပြဿနာမှာကဗျာ့ဘောင်သည်ဘာလဲ။ဘာပါလဲ။ သမားစဉ်ရှင်းမရခဲ့သောပြဿနာပါ။ကာရန်လား၊နိမိတ်ပုံလား၊ နရီလား။ မသိပါ။”

ဒါကဗျာပါဟု နံမည်တပ်နိုင်ဖို.ကဗျာ့ဘောင်ကိုရှာကြသည်။ ကာရန်ဟုပြောသူများပါသည်။ ဟုတ်သည်ဟုယူလိုကယူပါ။ကာရန်မပါသောကဗျာများကရယ်မောပါလိမ့်မည်။ကာရန်မပါသော်လည်း ကဗျာ့အသက်ရှိသောကဗျာများအပုံဖြစ်ကြောင်း ပြောမနေတော့ပါ။ သူတို.ကာရန်နှင့်သူတို.ပျော်ပါစေ။

ပြန်မေးပါမည်။ ဦးပုည၏ ထီပေါက်တွက်ကိန်း၊နူနာပျောက်နည်းတေးထပ်များသည်ကဗျာလား။ခက်တော့လည်းခက်ပါသည်။

+++++++

ရစ်သမ်ဟုလည်းပြောကြပါသည်။ ကိုယ့်အစွဲနှင့်ကိုပါ။ ရစ်သမ်ဟူသည်ရှိပါလိမ့်မည်။ ပေတံနှင့်တိုင်းတာပြ၍မရပါ။ ဆရာမြဇင်တို.၊မောင်သာနိုးတို.စာအုပ်တွေရှိပါသည်။ ဖတ်လိုကဖတ်ပါ။ပိုရှုပ်သွားပါမည်။တာရာမင်းဝေအင်တာဗျူး တွင်ပါဘူးပါသည်။ ရှာဖတ်ရန်လွယ်ပါသည်။ ယခုမှကဗျာစရေးသူများဖတ်ရန်မလိုပါ။ ကဗျာဆရာများဖတ်ရန်မလိုပါ။ ပပ၀တီကို ဘယ်အရာကလှသလဲသိအောင် မျက်လုံးကော်ထုတ်၊နှားခေါင်းဖြတ်၍ လေ့လာသည်နှင့်တူပါမည်။

အလွယ်ဆုံးကတော့ကဗျာဖတ်ရန်သာဖြစ်ပါမည်။ ဟင်း၏အရသာသည် ဟင်းကိုစားမှသိပါမည်။ ဆားမှာမရှိပါ၊ငရုတ်သီးမှာမရှိပါ။ယင်းအရာများမပါလည်းမဖြစ်ပါ။ကဗျာများများဖတ်ပါ ဟုသာညွှန်းပါသည်။

+++++

ကဗျာအတွက်လျောက်လဲချက်ပေးရန်မလိုပါ။ကဗျာသည်ကဗျာသာဖြစ်ပါသည်။ကိုးကွယ်ရန်လည်းမလိုပါ။နှိမ့်ချရန်လည်းမလိုပါ။ ရေးချင်၍ရေးနေသူတွေ၏လက်ကိုတော့ တုတ်နှင့်လာမရိုက်စေလိုပါ။

ဖတ်လိုလျှင်ဖတ်ပါ။မဖတ်လိုလျှင်မဖတ်ပါနှင့်။ရေးလိုလျှင်ရေးပါ၊ မရေးလိုလျှင်မရေးပါနှင့်။ပြောခဲ့သမျှသည် ယခုလို ကလေးပြောပြောရန်သာ ဖြစ်ပါသည်။