ဣတ္ထိယ၀ါဒီပီပီ
လောကဓံတရား ရှစ်ပါးကို
ထောင်ထားခြားနားဖို့
ဆန်စင်ရာ ကျည်ပွေ့လိုက်တတ်သော
တစ်ကွက်ချန် ပုထုဇဉ်တွေရဲ့
ချုံကြားနဲ့ ဘုံဖျား ယောင်သံများအား
ခပ်ရိုင်းရိုင်း ထုဆစ်လိုက်တိုင်း
လူးလှိမ့်လွယ် မျက်နှာကြောမှာ
အလျှံတညီးညီး တောက်လောင်ထင်ဟပ်
မစားရ၀ခမန်း အကဲစမ်းတတ်တဲ့
ကျောက်ခေတ်လို လူတန်းစားများ
ကျီစယ်ရက်သော ကျောက်တုံးတစ်ချက်
မတောက်တခေါက် အန္တရာယ်သင့်သွားတယ်

 ခက်တာပဲလေ
ပြီးသွားတဲ့ ဒုက္ခဆိုတာ
ရနေတဲ့ ဒုက္ခလောက်မှ
ရင်ခုန်ဖွယ် မကောင်းတော့
စကားလုံးတွေ စေးပျစ်တိုင်း
ကိုယ့်လက်ညှိုးနဲ့ ကိုယ့်ဘက်ပြန်ထိုးခံရတာ
အခါးသီးဆုံးပဲ မဟုတ်လား

 ဘာပဲဖြစ်ဖြစ်လေ
သရဲသကြားလုံးစားထားတဲ့ လျှာဖျားလေးသုံး
ကိုယ်ချင်းစာပါတယ်ဆိုတဲ့ ဓါးသွားပေါ်
အစ်အောက် စုံစမ်းတတ်သော
ဂျစ်ပစီသကာ ခပ်ပါးပါးတင်
သက်သောင့်သက်သာ နားလည်နိုင်ရေး
အနုပညာ အချိုးအစား မပြေပြစ်သေးတဲ့
ခပ်တုံးတုံး ကျွန်မကို
မြိန်ရေရှက်ရေ ပါးပါးလှီးတာလည်း ခံရဖူးတယ်

 အေးခဲနေတဲ့ ကိုယ်ချင်းစာအသိ
လုယက်ခံလိုက်ရတဲ့ ပုဂ္ဂလိကအခွင့်အရေး
လှေနံဓါးထစ် အသိပညာ
ယန္တရားဆန်လာတဲ့ အတွက်အချက်
ကရွတ်ကင်းလျှောက် လူနေမှုဘ၀နဲ့
သူမလိုချင်တာ ပြန်ရဖို့
စားပြီးတဲ့ ပန်းကန်တစ်ချပ်လို
ဖဲ့ဆေး ဆေးတာလည်း ခံရဖူးတယ်

 ဒီလိုနဲ့ ကဗျာတွေမှာ
အနုပညာ အတွင်းသားတက်ဖို့
ကိုယ့်ကိုယ်ကို တံဆိပ်ကပ်တိုင်း
Supermarket ထဲက အမြန်ဗိုက်ဝလွယ်တဲ့
Fast Food နဲ့ မှားမှာလည်းစိုးတယ်

 အိပ်မက်တွေ ပိပိနေတတ်တဲ့
လားရာမဲ့ နှုတ်ခမ်းနီတစ်တောင့်လောက်
ဆွဲဆောင်မှု မရှိမှာလည်းစိုးတယ်

 ညှစ်ထုတ်နိုင်စွမ်း နည်းသွားတဲ့
မြောင်းထဲရောက် ကြံကြိတ်ဖတ်တွေလို
အချိုရည် ခမ်းသွားမှာလည်းစိုးတယ်

 ဖြူနီညိုပြာ အနှစ်သာရတိုင်းမှာ
ဖြတ်သန်းမှု သက်လုံတွေရဲ့
စုတ်ချက် ကြမ်းသွားမှာလည်းစိုးတယ်

 ဘ၀ ဖလင်တစ်ကဒ်မှာ
ချစ်ခြင်းရဲ့ နဂ္ဂတစ်နှစ်ချပ်
အဆက်ပြတ်သွားမှာလည်းစိုးတယ်

 ထားပါတော့ ခုချိန်မှာ
သရဖူဆောင်းတဲ့ ဘုရင်မပဲဖြစ်ဖြစ်
တဲကုပ်ထဲက ငတ်နေသူပဲဖြစ်ဖြစ်
ကဏ္ဍကောစ မိုးမှောင်ပြတိုင်း
ကဗျာဖွဲ့ဖို့ လုံလောက်တဲ့ ရာသီဥတုမှာ
လင်းလက်ခွင့် ရလာခြင်းဟာ
ဦးတည်ချက်နဲ့ ဆန္ဒနှစ်ဖက်ကြား
ယုတ္တိဗေဒ ချိန်သီးတစ်ခုကို
မြှောက်လွှဲလွန်းထိုးဖို့
ခွန်အားတွေပဲ မှတ်ယူလိုက်ပါ့မယ်