ဟိုဝေးဝေးက၊ ရေးရေးသာမြင်
ပျပျထင်သည်၊ တောင်စဉ်တောတန်း
နှင်းမြူလွှမ်း..

တောင်တန်းရီပြာ၊ မြူဆိုင်းကာနှင့်
ပဝါတိမ်စ၊ ရစ်သိုင်းကျလျက်
အလှဟုမြင်၊ စိတ်၌ထင်သည်
ဝန်းကျင်သာယာ လှတယ်ကို။

တောင်ခြေကိုသွား၊ တောင်နားမှာကြည့်
တွေ့မြင်မိသည်၊ ဆူးပြည့်နွယ်ပေါ
ခရောင်းတောနှင့်၊ သစ်တောချုံဖုတ်
ခလုတ်ကန်သင်း၊ အတက်ဆင်းတွေ
ကျောက်ရင်းကျောက်ခက်၊
ကျောက်တက်ကျောက်ဆွယ်
အသွယ်သွယ်တွေ၊ တွေ့ရလေမှ
တောင်ခြေရိုးမ၊ စိမ်းမြမြ၏
ဘဝသရုပ် ပေါ်တော့သည်။

မောင်စိန်ဝင်း (ပုတီးကုန်း)