အချည်းနှီး မီးအိမ် (ကြည်အေး)

ညဉ့်မှောင်ကြီးမှာ

မီးပုံးအပြာ ၊ ရှာယူလာပြီး

လသာဆောင်စွန်း ၊ တိုင်ထိပ်တန်းမှာ

ကြေးနန်းနှင့်တဲ ၊ တွဲလိတွဲလောင်း

ချိတ်ဆွဲလိုက်ပြီး ၊ အချည်းနှီးပင်

ထီးတည်းထိုင်ကာ နေမိ၏။

အဘယ်သူလျှင်

အမူညံ့သက် ၊ ပြုံးနှုတ်ဆက်နှင့်

ဝင်းပြက်မီးခိုင် ၊ ဖယောင်းတိုင်ကို

ကိုင်ဆောင်လာပြီး ၊ ရိုလေရီးခို

ဖော့စီးညင်သာ ၊ မီးပုံးပြာမှာ

စိုက်လာထွန်းညှိပါမည်နည်း။

တွတ်တွတ်ညည်း၍

ညဉ့်လည်းအေးအေး ၊ ငါ့လည်းငေးမိ

ပြေးလွှားမြူးခုန် ၊ အစုန်အဆန်

လေပြန်ဝှေ့နောက် ၊ လေရူးပေါက်မှာ

ဂနာမငြိမ် ၊ ငါ့မီးအိမ်သည်

တွန့်လိမ်လူးလွန့် နေသည်တကား။

– ကြည်အေး

( ရှုမ၀ ၊ ၁၉၄၉ ၊ ဇူလိုင် )

In: ကဗျာ,ကြည်အေး Posted By: ဖြိုးဖြိုး Date: Mar 3, 2014

Leave comment commentinfo