ပြန်မရနိုင်မှန်း သိပေမယ့်

ငါအိမ်မက် အပိုင်းအစတွေကို ထုပ်ပိုး

မင်းရင်ခွင်ဆီ အရောက်ပြန်လှမ်းခဲ့ချင်တယ် . . . ။

မျိုသိပ်ကြိတ်မှတ် မမေးဖြစ်ခဲ့တဲ့ စကားတွေ

ပေါက်ကွဲလုလု မီးတောင်တစ်လုံးလို

ရင်ထဲမှာ တမြေ့မြေ့ လောင်ကျွမ်းနေခဲ့တာ

အခုချိန်ထိပါပဲ . . .။

တစ်စွန်းတစ်စနဲ့   . . . . .

အဆုံးအစမဲ့ ကြားနေရတဲ့ မင်းသတင်းတွေ

ဒီအချိန် . . .

မင်းရင်ထဲမှာ ဘာတွေရှိနေမလဲဆိုတဲ့ အတွေး

ငါ. . .

သက်ပြင်းမောတွေသာ အခါခါရှိုက်ခဲ့မိတယ် . . .။

“ ဘယ်တော့မှ ပြန်လှည့်မကြည့်ကြေး ”

ခပ်စိမ်းစိမ်း လှမ်းပြောလိုက်တဲ့ မင်းမျက်ဝန်း

ဒူးထောက်ပြိုလဲမတတ် တုန်လှုပ်ခဲ့မိပေမယ့်

ငါ့ နှုတ်ခမ်းမှာ မဲ့ပြုံးတစ်ခု

ဘာကြောင့်များ တပ်ဆင်ဖြစ်ခဲ့တာလဲ . . . .။

မာနဆိုတဲ့ အရာကို

ငါတို့ရဲ့ အချစ်တွေထက် ပိုကိုးကွယ်မိခဲ့ကြတာ

ငါတို့ သိပ်မှားခဲ့တယ် . . .၊

ပြတ်တောက်သွားတဲ့ အရာတွေထဲမှာ

သံယောဇဉ်ဆိုတာ မပါဝင်နိုင်မှန်း

မင်းလဲ သိနေမှာပါ . . . .။

ဘာလို့များ . . . ? ဘာလို့များ . . .?

တို့ ဝေးခဲ့ကြတာလဲ . . . .၊

မာနကိုဆုပ်ကိုင်ပြီး

အမှန်တရားနှစ်ခုရဲ့ ထိပ်တိုက်တွေ့ဆုံခြင်းမှာ

ဓါးစာခံက မင်းနဲ့ ငါရဲ့ အချစ်တွေ . . .  .။